قصيدة الجمهرة- حامد زيد

إي بالله أخطوا والخطا اللي جابهم عين الصواب

مايملي عيون الحسود بهالزمن غير التراب

اللي من أولها خراب أكيد تاليها خراب

ودك اليامن جاتك الغلطه من الناس القراب

مشكلتي إني ماعرفت أحسب لصدتهم حساب

صوت ٍ يصول بمنبره واخطاب مامثله خطاب

مافيه دمع ٍ صوبوه أحبابي بوجهي وخاب

كل الزهاب اللي معي ذكرى من أصحاب الزهاب

لأني تجنبت الغرق.. عديت من فوق السحاب

والله ماحطيت بين الحقدوالخوه حجاب

البارحه ثارت علي رقاب وأوتني رقاب

أثر المصايب ماتجيك إلا من الناس القراب

أهب ياوجه الحسد وشلون جمعهم وغاب

لابارك الله في رفيق ٍ تزعله كلمة عتاب

الصاحب اللي مايجي من صحبته غير العذاب

من يفتح لفرقاي باب أفك له عشرين باب

عو ّدت نفسي كل ماشددت لليمّه ركاب

أن روّحوا فأنا بري منهم ليوم الحساب

شفهم لهم حول السنه ولا خذوا مني جواب

ماكنت أحاتيهم صغيّير ..عاد أحاتيهم شباب

شفني جمعت أوراقهم بكتاب وأغلقت الكتاب

اللي يخاف من الظما يترك لنا طرد السراب

عقب أكتئاب البارحه ماعاد انا حمل إكتئاب

انا تجرعت الظما لين أحترق وجهي وذاب

انا خسرت اللي غيابه غير عن كل الغياب

انا أكثر (أنسان) تعلم من كثر ماأخطأ وصاب

انا القصيد اللي فزع من دفتره مليون ناب

جفني وجرّحه السهر ، حيلي وهدّته الصعاب

شيبت بعقول العرب..هيبت روس ٍ ماتهاب

ماصرت ذيب إلا لأن اللي تحدوني ذياب

ترى حلاتك لاحملت لصاحبك كلمة عتاب

في هالزمن مايملي عيون الحسود إلا التراب

ودك اليامن جاتك الغلطه من الناس القراب